ತಾಕೊಡೆಂತ್ ಕ್ರೀಸ್ತಿ ಶಿಕ್ಷಣಾಚೊ ದೀಸ್‌
ಫೆಬ್ರೆರ್‌ 23 ಆಯ್ತಾರಾ ಸಕಾಳಿಂ 8.೦೦ ವರಾಂಚ್ಯಾ ಮಿಸಾ ವೆಳಾರ್‌ ಕ್ರೀಸ್ತಿ ಶಿಕ್ಷಣಾಚೊ ದೀಸ್‌ ಸಂಭ್ರಮ್ಲೊ. ಸಗ್ಳ್ಯಾ ವರ್ಸಾ ಫಿರ್ಗಜೆಚ್ಯಾ ಭುರ್ಗ್ಯಾಂಚೆರ್‌ ತಶೆಂಚ್ ಶಿಕ್ಷಕಾಂಚೆರ್‌ ದೆವಾನ್‌ ವೊತ್‌ಲ್ಲ್ಯಾ ಸರ್ವ್‌ ಆರ್ಶೀವಾದಾಂ ಆನಿ ಕುರ್ಪೆ ದೆಣ್ಯಾ ಖಾತಿರ್‌ ಅರ್ಗಾಂ ಬಲಿದಾನ್‌ ಭೆಟಯ್ಲೆಂ. ಮಿಸಾಚ್ಯಾ ಬಲಿದಾನಾಕ್‌ ಪ್ರಧಾನ್‌ ಯಾಜಕ್‌ ಜಾವ್ನ್‌ ಮಾ. ಬಾ. ಅರುಣ್ ಲೋಬೊ ಹಾಜರ್‌ ಆಸ್‌ಲ್ಲೆ.
ಮಿಸಾ ಉಪ್ರಾಂತ್‌ ಫಿರ್ಗಜೆಚ್ಯಾ ಸಭಾ ಸಲಾಂತ್‌ ಸಂಸ್ಕೃತಿಕ್‌ ತಶೆಂಚ್ ವೆದಿ ಕಾರ್ಯೆಂ ಆಸಾ ಕೆಲ್ಲೆಂ. ವಿವಿಧ್ ಕ್ಲಾಸಿ ಥಾವ್ನ್‌ ವಿವಿಧ್ ಬೈಬಲ್‌ ಆಧಾರಿತ್‌ ನಾಚ್‌, ನಾಟ್ಕುಳೆ ಆನಿ ಮೌಲ್ಯಾಧರಿತ್‌ ಕಾರ್ಯಕ್ರಮಾಂ ಮಾಂಡುನ್‌ ಹಾಡ್ಲಿಂ. ವೆದಿ ಕಾರ್ಯವೆಳಾರ್‌ ಕ್ರೀಸ್ತಾಂವ್‌ ಶಿಕ್ಷಣಾಚಿ ಸಂಯೋಜಕಿ ಸುನಿತಾ ಟೀಚರಿನ್ 2024-25 ವರ್ಸಾಚಿ ವಾರ್ಷಿಕ್ ವರ್ದಿ ವಾಚ್ಲಿ. ಸಾಂಗಾತಾಚ್‌ ಆಲ್ತಾರ್‌ ಭುರ್ಗ್ಯಾಂಚಿ ಆನಿ ಮರಿಯಾಳ್‌ ಸೊಡಾಲಿಟಿಚಿ ವರ್ದಿ ವಾಚ್ಲಿ. ಪರೀಕ್ಷೆಂತ್‌ ಉತ್ತಮ್‌ ಅಂಕ್‌ ಜೊಡ್ಲೆಲ್ಯಾಂಕ್‌, ನೊಟ್ಸ್‌ ಬರೆಂ ಕರ್ನ್‌ ಬರಯ್ಲ್ಯಾಂಕ್‌, ಬೈಬಲ್‌ ವಾಕ್ಯ ಬರಯ್ಲ್ಯಾಂಕ್‌ ಆನಿ ಸದಾಂ ದೊತೊರ್ನಿಕ್‌ ಆಯಿಲ್ಲ್ಯಾಂಕ್‌ ಮಾನ್‌ ಕೆಲೊ. ವೈ.ಸಿ.ಎಸ್. ಸಾಂದ್ಯಾ ತರ್ಫೆನ್‌ ಅಧ್ಯಕ್ಷಿಣ್‌ ಅನ್ಸಿಯಾ ಡಿಸೋಜಾ ಹಾಣೆಂ ಪಾಟ್ಲ್ಯಾ 12 ವರ್ಸಾಂಚೊ ಕ್ರೀಸ್ತಿ ಶಿಕ್ಷಣಾಚೊ ಅನ್ಬೋಗ್‌ ಸರ್ವಾಂ ಸಂಗಿಂ ವಾಂಟುನ್‌ ಘೆತ್ಲೊ ಆನಿ ಶಿಕ್ಷಕಾಂಚೊ ಉಪ್ಕಾರ್‌ ಆಟಯ್ಲೊ.
ಹ್ಯಾ ಹಾರ್ಯಾಕ್‌ ಮುಖೆಲ್‌ ಸಯ್ರೆ ಜಾವ್ನ್‌ ಮಾ.ಬಾ. ಅರುಣ್ ಲೋಬೊ, ಶಾಂತಿ ಕಿರಣ್ ಕೌನ್ಸಿಲಿಂಗ್ ಸೆಂಟರ್‌, ಬಜ್ಜೋಡಿ ಹಾಚೆ ನಿರ್ದೆಶಕ್‌ ಹಾಜಿರ್‌ ಆಸುನ್‌ ತಾಣಿಂ ಆಪ್ಲೊ ಸಂದೇಶ್‌ ದಿಲೊ. ಸಾಂಗಾತಾಚ್‌ ವಿಗಾರ್, ಪಿ.ಗೊ. ಪ. ಉಪಾದ್ಯಕ್ಷ್‌, ಕಾರ್ಯದರ್ಶಿ, ಆಯೋಗ್‌ ಸಂಯೋಜಕ್‌, ಬ್ರದರ್‌ ವಿನೊಲ್‌, ಸಿ. ರೀನಾ ಆನಿ ಕ್ರೀಸ್ತಾಂವ್‌ ಶಿಕ್ಷಣಾಚಿ ಸಂಯೋಜಕಿ ಸುನಿತಾ ಟೀಚರ್‌ ವೆದಿರ್‌ ಹಾಜಿರ್‌ ಆಸ್ಲಿಂ. ಪಿ.ಗೊ. ಪ. ಕಾರ್ಯದರ್ಶಿ, ಬ್ರದರ್‌ ವಿನೊಲ್‌, ವಿಗಾರ್ ಹಾಣಿ ಆಪ್ಲೊ ಸಂದೇಶ್‌ ದಿಲೊ. ಆಕೇರಿಕ್‌ ಸರ್ವ್‌ ಭುರ್ಗ್ಯಾಂಕ್‌ ಐಸ್‌ಕ್ರೀಮ್‌ ವಾಂಟ್ಲೆಂ. ಅಶೆಂ ಕ್ರೀಸ್ತಿ ಶಿಕ್ಷಣಾಚೊ ದಿವಸ್‌ ಭೋವ್‌ ಅರ್ಥಾಭರಿತ್‌ ರಿತಿನ್‌ ಸಂಭ್ರಮ್ಲೊ.
ಚಡ್ತಿಕ್‌ ವಿವರಾಕ್‌ ಹ್ಯಾ ವೆಬ್‌ಸೈಟಾಚ್ಯಾ ಲಿಂಕಾಕ್‌ ಕ್ಲಿಕ್‌ ಕರಾ https://www.taccodechurch.in
Comments
Post a Comment